ديوان الشاعر محمد بن الذيب

(( سكر زيادة ))


رب أخ لم تلده أمك في هيئة خوي
ما تنتهي مدته ولا صلاحيته
وأنا ويش ابغي من الشخص القويم السوي
الا احترامه لشخصي في علانيّته
والنفس قد تنطوي على ما قد تنطوي
ماني بربه أعرف اللي في نفسيّته
حديث خير البشر في شرحه النبوي
أعمال كل امرئٍ على حسب نيّته
وأنا مثل من طموحه للعلا منتوي
ولا تعدى طموحه حد سطحيّته
لكن لو أن راس مالي فالبنوك ضغوي
حمدت ربي على نعمة عبوديّته
مثل الشبح الأحمر اللي عند مصطفوي
اللي فريدٍ فتركيبه ونوعيّته
عشقت لي بنت وأثر الليل ليل سروي
وان راح الليل دربي ويش تاليّته
واثر الغرام الذكوري كنّه الأنثوي
متفشي وكل منهم فيه خاصيّته
قالت من أنته من أنته قلت رجال بدوي
ثقافته ما هي تعارض على حبيّته
سحاب له ضجيج ودوي
يا ما اشر بغترته وطاقيّته
جباننا لترفع سهم المنايا يا وي
يظهر له بموقفٍ تفخر به بنيّته
قالت من رجال يام مزبنين الخوي
قلت ولد عم بن حثلين وحميّته
قالت يا جن الغلا لو شفت ذيب يعوي
قلت أتعشاه لعيونش يا جنيّته
لكن ظلم السنين وقلبي المكتوي
تثر علي خوة الطيب وعقليّته
وقريحة الشاعر المبدع ما هي ترتوي
ويثبت احساسها حسب مزاجيّته
يا فاتنه سكّر زياده وسكر شوي
ابشرب زيادته وابشرب شويّته
تعبت أسدد فوائد حبك الربوي
والحب أناني ولا يدري بأنانيّته
أحلى بنات المدارس ثالثه ثانوي
ذراي قلبي وقلبي له نظريّته
عن خلقها لو درا وزيرنا التربوي
خلا من أخلاقها منهاج تربيّته
في وجهها الأمتحان الصعب الشفوي
سماحة أب القتيل اللي رفض ديّته
وفي جيدها لذة المدن فعيون قروي
وفقلبها طهره وطيبه وعفويّته
على شفاها مخارج اسمي اللغوي
وسويكي حروف اسمها في ميداليّته
هي همي الشهري وتحصيلي السنوي


(( المثقل بنزوات يوميّته ))


احتلت احساس خفاقٍ ما حوله ذوي
وأعضائي الباقيه تطمح لشرعيّته
يا جعلها تعيش حتى عقدها المئوي
وتشارك القلب في فرحة مئويّته
وصالها دموي وافراقها دموي
كن هتلر مورث الها من دمويّته
الشين ف أتفه زوايا حسنها منزوي
بالعكس تشكي ظروف القهر أقليّته
والا على الزين حيل الله يا قلبي قوي
الزين هي موطنه الأصلي وجنسيّته
في جيدها فوضويّة شاعرٍ فوضوي
وفعينها قسوة الفارس وحنيّته
خذيتها من يديني وجات تهوي
وصارت في يدي ما هي حيّه ولا ميّته
لو اني الشجره اللي للغصون تحوي
ما فيه غصن ماهي دابه ولا حيّته
لو انها الألتهاب القاتل الرئوي
قلت الوعد جنة المسلم يا حوريّته
ايعزها الشوق لين تخضر وتستوي
وتعيش من حسنة المسلم ومن سيّته
واثارها بنت حوا فاتنه وتغوي


(( بني ياس ))

ياصاحبي سالم بن غدير الناس
لو تكشف اللي فالضماير مخبا
كان انطحن حبن مايطحن بذا الراس
لكن ذنوب الصالحين أتغبا
ابغيك تعطيني كيلوين ألماس
وكيلو ذهب صافي وكيلو يالبا
لعيون بنت ٍ فاتنه من بني ياس
متربيه بس الغلا ماتربا
ان وقفت مثل الزهر بين الاطعاس
ويلا مشت فرس أصيله وقبا
ريحت نفسها غير عن كل الانفاس
وان سولفت حتى البليغ أيتهبا
في مدحها جاني من الشعر هوجاس
وصبحت متنبي شعر وتنبا
لو عرضت على الفقيه ابن مرداس
يمكن يحلق لحيته ويتصبا
كنك مشربني من الفوتقا كاس
ولياسبتني الخفوق المسبا
والقلب لامنه فضا شوق وحساس
لو جيت بتعبيه ماينتعبا
الين تعشق فاتنه من بني ياس
متربيه بس النحر ماتربا

[/color](( القصيد الحر ))


الخلل في معظم الأحيان ما هو في العقيده
الخلل في الناس والدنيا وسودان الكبودي
فلسفة ان العرب ترطن عرب فكره أكيده
لو نزور الهند ما نرطن مثل رطن الهنودي
واعتبار ان البحر ويش ينقصه ولا يزيده
مثل يوم من العمر لا راح لا يمكن يعودي
واختلاف الراي الآخر لا نسميها مكيده
علموا حزب اليمين الا طغى حزب اللكودي
شاعرٍ مثل الجبل تبكي عيونه كم حيده
الشرف لا مات للأموات ولا لللحودي
السؤال أخبال والعالم وش اللي تستفيده
ودي أسولف عن الحجه ولا عندي شهودي
أسمحولي يا محررة المجله والجريده
عن حرارة معظم الأجسام يقنعني برودي
شاعرٍ مجنون واسوّي لي من العالم بديده
والحقيقه ما هو فنقص العرب ولا فزودي
لكن الأول من الثاني مسافات بعيده
أنتعش يا اقتصاد اهل الأدب وانا ف ركودي
عربجي واتعب على البيت القوي واقدر واجيده
والقصيده كل ما غنيت ترقى بي سنودي
انتصرت وما لقيت من انتصاراتي ما اريده
وانهزمت ولا تنازل كبريائي عن صمودي
والغلا ينصب في الخفاق ويفجر وريده
يا سلام الله على اللي حبها بيّح سدودي
قالت ابن الذيب قلت ايه قالت عطني قصيده
قلت يا لبيه ذعذع يانسيم ويا وجودي
يا وجودي وجد من محزنته اشياء عديده
الأوله منها خضوع البيت الأقصى لليهودي
تثني اعقال الغرام وكن ما يكفيه قيده
لعنبوها في القصيد الحر والشعر العمودي
تسحب الولهان من قلبه وتحذف به مع يده
غطرسة نزار مع عفويتك يا الأبنودي
عرضت كأنها ديانا قلت أنا دودي الفقيده
أثر مابه واحدٍ ما شافها ماهو ب دودي
تشبه أحلى بيت قلته في قصيده لي جديده
يوم موّتتني هبايب مفرق الحد السعودي
امش سيده ثم تيامن يا تيامن وامش سيده
ردفها لا هزها النسناس والحبل امعقودي
لا تنهكت حدود منحرها سعى للثار جيده
لين قررت أخمد الفتنه على كل الحدودي
يوم قامت معركه فيها مشاعرنا شهيده
ما كفاني في رغى البكره هديرك يا قعودي
حركت قطب الجليد ف قلبي وذاب ف جليده
وزرعت كل الصحاري في خفوقي بالورودي
علّمت فكري يدافع عن مباديها الحميده
حثت الهاجس على بذل المزيد من الجهودي
لين قامت ريحة الحب الجديده والعتيده
تقتبس ريح المطر لا فاح به عشب النفودي
ثم حلفت انها ما تطري غير اسوّي لي قصيده
في ضواحي هل قطر والا على الحد السعودي


(( قد صيح التاريخ ))


ياضيوفنا بيض الوجيه السمحه النبل الكرام
الليله العين الحزينه ماحن أمبكينها
يامرحبا ترحيبة فيها غلا ولا انسجام
تكاثروها القوم والعجمان متشاوينها
الله خلقنا فدرجات وكل انسان مقام
لكن قربه من عباده في تفاوت دينها
والعين مدهال السهر والقلب مدهال الهيام
والانفعال اللي يسببه التفاعل بينها
وشرف علامات السماحه فالوجيه الابتسام
وعزها ضحكة أحجاجك ساعة ٍ ياشينها
يامعزز لصبيان يام بقدرتك برجال يام
لازمت من فوق الرجال أستر علي من عينها
ون طاحت الدنيا على راسي ماخلتني حطام
أصيح بقصى يام وعيوني على شبرينها
ياوجد حالي يابني عم السعد في كل عام
يوم المواتر خيل والموت الاحمر تأمينها
اليا وقفنا مع طويلين الشبور أنشق خام
اما لعين ابن المرظف أو لبن حثلينها
والطنخه اللي صدق والفعل المحكحك والكلام
فعول ربعي يوم طاح أبن جلوي في عيينها
يوم أعتزينا والحراب مركزه والدرب شام
صدورنا مدهال لطعنات ومضرينها
قد صيح التاريخ يالعجمان مامنها سلام
النصر ولا الموت قلنا هاتها ثنتينها


(( الشاعر البناتي ))


ماهوب كالأتي ولا كالاتي
اجيبها مثنيت(ن)مربوعه
والمومن اللي ماهو بمرأتي
ماني بضامن سيفه وفاروعه
اكسر عيون الشاعر البناتي
واللي يفتل شاربه فربوعه
واوقف الحالي وريحي عاتي
والعب بحسبتهم وهم مجموعه
وش كان حال الشعر قدام اتي
سؤال ومحير كذا مطبوعه
مجلة(ن)ماهي تلامس ذاتي
لاهي بمقروءه ولا مسموعه
الذ منشيتات منشيتاتي
والبحر والابداع والموسوعه
لكن صباح الخير يامولاتي
فريد من تركيبه ومن نوعه
يالفارقه دايم على البناتي
والفاتنه جدا"ولكثر روعه
لايسمع السلطان تصريحاتي
يهل وضاح اليمان ادموعه
ياسيدة حسناتي وسيئاتي
والشوق والفرقاء وكثر اللوعه
قرأني وانجيلي وتوراتي
والوصل من جدوله لي ينبوعه
تجبرني ارفع لسماء نظراتي
مشاعري لمواصلك مدفوعه
الله يعطيني على نياتي
ومن الرذيله والرداء مرفوعه
مبدع وبيت(ن)واحد من ابياتي
تفخر بنشراته كذا مطبوعه


(( تنحرت القصيد ))


اسر يا ليل وانته ليل وحسابك على السهران
أعلمك .. الحياه .. ومرحلتها الإنسيابية
على وجه البسيطة..أفرق الماضي من المليان
وأغني لي ببيت وتنتحر.. عشرين حورية
وبعد هبّت على خشمي هبايب موسم الأحزان
تنحرت القصيد..اللي تبكّيني معانيّه
أنا عز الله إني..ما نسيتك يا صدى الحرمان
لو إن مابه علاقة غير حب الخي للخية
تجمّعنا مساحات الأدب..والحزن والقيفان
وتربطنا تقاليد العرب..والشيمه الحية
كثر ما الهم في قلبك..ديون مالها ديّان
أحس الكون في عينك..حكومة دكتاتورية
أشوف إن في قصيدك سلطة الحاكم على الرعيان
ولو تزعل..حركات التذمر الانفصالية
أنا لي بنت فكر من وصلها علمك مسيّان
وطاها ما وطى قلب اليتيم ف أمه وبيّه
لو أن ما يرهب الشجعان..لا من فرّوا الشجعان
سوى صهلة خيول القوم ودموع السنافيّة
أي والله ببكي وبنثر دموع المعرفة من شان
تعابير الغلا..والقلب الأبيض..والمحنيّة
وأنا لولا الأحاسيس النظاف وصادق الوجدان
نحرت خيول دمعي..قبل تاطىء..جفن عينية
لو إن ما أنتي بعجمية تعازيها على العجمان
لكنك في عيوني..أقرب من الفين عجمية
لو إن ما أنتي صحابية لها بين الصحابة شان
لكن عندك من أخلاق..أم عمّار الصحابية
لكن يا قلب ياللي فيك..غصن يابس وذبلان
لا تبلش في السنين المقبلة والأولانية
اهي مثل الأديب اللي توفى ظامي وجيعان
توفى واكتفت كل القبور الإرتوازية
وأنا مثل العزيز اللي يعرف إن الفقير إنسان
ولكن عذره من الله الأوّل..ثم مخابيّة
وهي تدري ما فيه أقسى من مفارق ربى الأوطان
سوى اللي ينكر أن الجمر يحرق رجل واطيّة
وأنا اللي ما عرف نعمة تساوي نعمة النسيان
ولولاها..غدت كبد البنادم..جمرة حية
عليها من تباريح الحزن آية من القرآن
ويلهم أهلها صبر النبي عيسى و حواريّة


(( فنجال بن راجس ))


فنجال بن راجس ياشيخ الفناجيل
خلك مع السبعان ولا معانا
على خوياهم ماتضيق المداخيل
وحنا بعد ماهي تضيق أخويانا
ولانقصر في الرجال المشاكيل
قبايل قدامنا او ورانا
لكن ياطلعة كرى وادي السيل
حرك نسيمه خافي الشوق وانا
غنيت للمرزم وغنيت لسهيل
ملوكنا وشيوخنا وقصرانا
واللي غلاها كل ماعالت يعيل
ورموشها سود وتبانا تبانا
لو ان حن يوم أبرهه جا على الفيل
على حدود قريش كانت حمانا
ما أرسل عليه الله طيوراً ابابيل
لأنه هو اللي عزنا وأصطفانا
ومن أشرف أهل الهجن والطيب والخيل
ثلاثة ارباع الملوك أنسبانا
وبنت الردي ماتنوخذ للحلاحيل
تفاخروا على النساء يانسانا
حريمنا قدوه بعض الرياجيل
وشف فوقهم بعض العرب مستوانا


(( لندن ))


يا لندن أنا فاقدن لي مطيري
ومطير غير وهيبتي عندهم غير
ولا نكر طيب القبايل ضميري
لكن أنا ميت على خوة مطير
سلام يا خالد سلام أميري
لو أنك مواطن بلد منت بأمير
خليتني في وسط لندن مصيري
مثل مصير مقيط في جعبة البير
والقوت لو يبكي رفيق الحريري
بكا على جساس أو سالم الزير
عندك خبر لا من خسر جون كيري
تقوى علاقة بوش مع توني بلير
اتصدق اني من مسجك الأخيري
ماغير أقول الله يذكرك بالخير
قصايدك مثل الذهب فالحريري
شاعر وماشاء الله عندك جماهير
وترى القصيده كلها من ضميري
من بيتي الأول الى البيت الأخير


(( يا عرب نجران ))


الهواء نسناس والليل ابتداء والشعر دوبه
يا قصيدي لا يروِعك الزمن والليل ساري
وان مدحت امدح رجل ذكره الي منهم حكوبه
ثارت البندق وسال الدم من روس الشباري
يا عرب نجران صيحوا من شماله لي جنوبه
ومن علوه لين حدريه وانا ما اثني قراري
وصلوا للمكرمي سلام فيه من العذوبه
ما يداوي علة المرضان ويرد اعتباري
هيبته تذكر ووقفاته مع الناس محسوبه
يا شذا العود المعتّق يا هوا البن الهراري
ما نسينا يوم جدك ناصر عجيم بحروبه
تدري العجمان وابن الذيب يا العجمان داري
يكفي ان يمناك في الصكات ما هي بمعطوبه
وشاربك ما يدسّم الا من ظهر ذيب المساري
انت جدك مرجع الديره ولا خيب شعوبه
لك مثل ما له فعول وفيك من جدك مواري
احتزم بإسم الديانه والعقيده والعروبه
وانت تدري كل غمرٍ من ضنى يام انتحاري
والقصيده في حسين ابن اسماعيل العجوبه
تجبر الشاعر يطوح غترته والضغط ناري
جُُل همه: كيف تفهم كل ذا العالم اسلوبه
ما طمع في مال بنك الراجحي ولا التجاري
كل دعوه من فمه تستحظر الغيم وهبوبه
وكل سجده منه ترسل لي من الايمان طاري
من طهارة قلبه تشوف النظافه وسط ثوبه
أي نعم ذا رأيي الشخصي ولاني باستشاري
في جبينه هيبة الأقصي وعشرين الف توبه
وفي كيانه هيبة اليامي وعزي وانتصاري
انت كنك بارد النسناس في عز الرطوبه
تبتسم وتندي الازهار وتهب الذواري
كل مامريت قصرك قمت ألد العين صوبه
كنك القصر المبين بمعركة ذات الصواري
في ضلال الدوله اللي عزها عز العروبه
يحفظ الله الملك والشيخ والصرح الحضاري


(( قلبي المرجوج ))


انا بدي أغني طرب والعرب ممسين
لاكن قلبي المرجوج ضايق ولا بده
أيلا من تغدى خالي الهم أبو قلبين
انا كبدي تعيف الغدى جعلها الغده
انا طرقي يرجي زمانه عساه يزين
ويلامن حصله قوت يومه نسى غده
ياقلبي لامن ضقت أش الضيق للمسكين
ويادمعي لامن سلت أخ والمرجله هده
وياعجمي لامنك طحت تكفى طيح بزين
أبا طيحتك طيحت شجاع ٍ ماهوب وده
وانا مانيب غشاش و الناس غشاشين
ولاجيبها من حد والناس من حده
لاكن علم اللي يكتب البيت والبيتين
أيلا سنع الضمه تبلش مع الشده
من البارحه واللي وراها ويلا ذلحين
وانا الشاعر اللي يطرق البحر ويقده
تقلدني الغاوين لاكن شلغاوين
لونها بتقليدي أيلا غبت مع سده
على الشيخ جاسم ودي أرسل كلامٍ زين
لاكن موتري مكينته تشتكي حده
ودور على جمسٍ ولاهو من الألفين
لاكن خمسه وسبعين ومغبرن شده
قد أستخدموه بشغلت القات والهروين
من أول يوم أعصابر الناس من شده
ولافيه ملكيه ولانمره وتأمين
ومع بندر بن سرور قد راحله مده
ولاهو أبو شكمان لاكن شكمانين
يحد الشبح بس الشبح ماهو يحده
ورفارفه حول البدي كنها مابين وبين
ايلامن شحطه ثنين راعيه ثم هده
ردايف هنوفن تلبس الجنز أبو خطين
أبيها ماهو مضبوط والأم مرتده
اسوقه انا والا حدا خواني الغالين
على شان ياصل علم من شيخ ويرده
ترا الشيح جاسم بن حمد من عرفته لين
هذا اليوم لين أموت أغليه ووده
ولي الفخر في كل توقيت والا حين
يمثل تميم أبحزة الضيق والشده
هذا الأدمي مخلوق من نور ماهو طين
يشاعرك من جده ويلا رضاك من جده
ادور على شوفه ولبي وأقول أمين
وعلى صحته ورضاه حتى على سده
عسا السد فاول شوط يكسب ثلاثه ثنين
أشجع مع الجمهور وانا مالي شده
لاكن ياطويل العمر عن طعنت السكين
مقامي عزيز ونفسي أكرم من المده
ترا اللي عند قصرك حقرني قبل شهرين
ماهو من هل العليا ولامن هل الرده
ياشيخ الهوى لامر خضر الغصون تلين
لاكنه لو يعرض على الضلع ماقده
وانا بين عرق المرظف وأبن حثلين
مانيب صلبين ويش خاله ويش جده
لا رحت صوب دبي وان جيت صوب العين
انا سمعتي بين الرجاجيل ممتده
لون الفقر وصدوف بقعا وضلع الدين
ترد الكريم أمن المواجيب وتلده
لاكن بالعزوم اللي لها القاسيات تهين
نوطي على خشم أسود الوجه ونضده
نحشم الصداقه وان فزعنا نجي عجلين
على موقفن ماكل رجل ٍ يجي قده
ترا صدة المقفين عادي وهم مقفين
لاكن صدة المقبل الا أقبل هي الصده
لاكنك طويل العمر وانا من الوافين
وذي ميزت العجمان في كل مسوده


(( العين مدهال السهر ))


ياضيوفنا بيض الوجيه النبله السمحه الكرام
الليله العين الحزينه ماحن مبكينها
يامرحبا ترحيب ن فيها غلا ولا انسجام
تكاثروها القوم والعجمان متشاوينها
الله خلقنا درجات وكل انسان ن مقام
لكن قربه من عباده في تفاوت دينها
والعين مدهال السهر والقلب مدهال الهيام
والانفعال اللي يسببه التفاؤل بينها
واشرف علامات السماحه في الوجيه الابتسام
واعزها ضحك الحجاج في ساعة ن يا شينها
يا معز ن صبيان يام بقدرتك برجال يام
لازمت من فوق الرجال استر علي من عينها
قد تعظم في عين الصغير اصغارها بس العظام
في عيونها تصغر متاهات الزمن وسنينها
وان طاحت الدنيا على راسي ما خلتني حطام
واصيح باقصى يام وعيوني على شبرينها
يا وجد حالي يابني عم السعد في كل عام
يوم المواتر خيل والموت الحمر تأمينها
واليا وقفنا مع طويلين الشبور نشق خام
يمال عين ابن مرضف او لبن حثلينها
والطنخه اللي صدق والفعل المحكحك والكلام
افعول ربعي يوم ردينا القضى في عيينها
يوم اعتزينا والحراب مركزه والدرب شام
واصدورنا مدهال للطعنات ومضرينها
في جسم الانسان الطبيعي حسب ما جا من علام
نظام ن اسمه كريات الدم واللي فجينها
هذي اذا ضقنا يجي فيها سوات الانقسام
تذوب لين من الغضب يغضب على تكوينها
يضخها عرق الطنا مثل العرق عبر المسام
اكبر اشعه نافذه ما عاد تدري وينها
قد صيح التاريخ يا العجمان ما منها سلام
النصر ولا الموت قلنا هاتها ثنتينها
لو الصحابه عاصروا راكان وحروب الامام
تجاوزت عما حصل في بدرها وحنينها
نملى عقول الناس فكر ونكسب اكثر الاحترام
ونجي ديار جهينه ونحشم كثير اجهينها
وارجيلنا فوق الثرى وارقابنا فوق الغمام
وان نحت ابراج السما حن اللي منحينها
ولا التهامي يلوي شدوقه ويصفقله تهام
واسيوفها ماهي تهوم الا على سكينها
ياقاني الجربا ترى ماهي تباع ولا تسام
لو تنطلي من خشمها لا فرس ن كراعينها
واللي في راسه حب ما يطحن وفي خشمه عرام
ياتي مع وجه العرب لا يمر مع جمبينها
في شارب ن في راشد اللي قومته لامنه قام
تهز راسي من طنخ وتشوش بي في حينها
ولا كبرت الحمله على كتف الجمل جبر العظام
ولا كتفه قد صلفات الزمن ولينها
والا نكحناها مع رجلينها وثمها حرام
وشلون ننكحها مع ثمها ورجلينها


(( واحد اثنين ثلاثة اربعة خمسه ))


واحد اثنين ثلاثه اربعة خمسة
يا لبيه يا اشرف بيوت الشعر واغلاها
وجيه الاجواد يا نايف ماهيب بعمسة
كن السعد يوم تقبل في محياها
طول على الغاز ولا تخرب الحمسة
سحابة الصيف فوقي تنشر ماها
ورعيان الارض امحنها القيض وشمسة
وانا ورى قصر بلقيص اتحراها
يحصون والصوت عالي وانت بالهمسة
تهز حكام الايام ورعياها
يابوظبي لو ان همي الرمسه
ما جيتكم من دبي وزواياها
فديت كبد الهنوف اللي من اللمسة
تكسر كن الخمر مصنوع في حناياها
وارثة القلب لا ثمنه ولا خمسة
والذ واشهى علووم الحب واحلاها
هي غد .. من قوت يوم رغيف امسة
في ساعة لا تذكرها تماناها
تحب غيري !ّ! ثلاثه .. اربعة .. خمسة
لهم لا احاسيس وانا لي ثناياها


(( الصدر ضايق ))


الصدر ضايق وصبري يا حسن طول
ودي اغادر لو في وسط غواصه
انا اشهد اني ماحب العالم الاول
ماغير كاس بو ماجد ورقاصه
حظارة زايدة واعلام مهُول
حتى البزر يرضع الوسكي بمصاصه
صحيح فيها الجمال وجوها يهول
وقفِ لهلها وحنا بس بصاصه
شفي مع لابتي شيبان معُول
ربع نهار الوهى للروس قناصه
نصبر على الحب ونصاليه لاطوًل
وقتِ مضى محتمين هجر وخلاصه
حنا هل الطايله ذلحين ومن اول
من طاح في نحورنا ياصعب مخلاصه
صغيرنا يحتمي الميقاف لا حوُل
لو الفخر وسط جوف البحر لا أغاصه
للكايده نتعب الرجلين ونهروُل
يوم ان ولد الردي رجليه لواصه
نتعب على الطيب لجل المركز الاول
ندعس الطريق الخطر ماقيل حواصه
عن لابتي نايب وللشعر مخوُل
قصيدي الجزل جلسني على ماصه

مشكوووووووورة اختى العزيزة اللؤلؤة على الموضوع الرائع

وتواصلك معنا هوا الاروع


فتقبلي مروري كأس العذاب